KANGGONE inyong (71
taun) sing delairna, degedhekna utawane detuwakna neng Pabuwaran, mulane kaya
kena dearani inyong wis ngerti, wis apal kecepal abang ijone utawa kit A gutul
Z Pabuwaran, Gemiyen desa Pabuwaran klebu tlatah kecamatan Baturaden, molahi
taun 1981 kanti anane Kota Administratip (Kotatip) Purwokerto desa Pabuwaran
derubah dadi kelurahan Pabuwaran mlebu tlatah kecamatan Purwokerto Utara.
Gili gedhe mujur ngalor ngidul sekang
desa Pegalongan Patikraja gutul Baturaden sing liwat Pabuwaran kuwe anu debangun
dhong jaman Landa, sing tujuane nggo dalan ngangkut tebu sekang desa-desa
maring pabrik gula sing ana neng Purwokerto utawa Kalibagor. Apa kuwe nganggo
ril lori apa dene gili darat nganggo grobag. Gemiyen neng pinggir gili
Pabuwaran kuwe ana dalan ril lori tebu. Mulane desa Pabuwaran keliwatan gili
kuwe marahi desa Pabuwaran tambah regeng akeh wong liwat, mbuh keperluan arep
dagang apa dene keperluan sejene.
Akeh pisan wong padha bakulan, kena
darani sewernane kebutuhan pedinan, ana beras, janganan, woh-wohan, inuman
(cau, dhawet, badheg), kewan (ayam, wedhus), suruh, ana pring, suluh padha
degendhong, desunggu utawa depikul degawa ngidul arep dedol neng Purwokerto.
Angger dina wagean giline lewih rame maning, merga pasar Wage dina pasaran.
Saking akehe wong mlaku esuk mangkat sekang lor utawa awan-sore padha balik
sekang kidul marahi desa Pabuwaran (klebu) akeh warung barang pedinan karo
warung medang-madhange.
Kiye kena nggo bandhingan dhong taun
1960an pas giline rame (lagi bada) kendaraan sing liwat semenit mung siji, kuwe
mbuh ngalor mbuh ngidul pokoke liwat lah. Lha warung medang sing ana neng
tlatah desa Pabuwaran kit UNSOED gutul mesjid Al-Ihya angger ora kleru ya
watara 4 utawa 5 warung medang. Lha mbareng siki, pas kahanan biasa (dudu bada
utawa taun baru) kendaraan sing liwat saben semenite kayane ora kurang sekang
200 kendaraan, Lha warung utawa rumah makan sing ana neng pinggir gili sing
dawane watara 400 meter kuwe watara 30an panggonan lah. Apa maning angger malen
Minggu, Pabuwaran macet neng mobil sing wong-wonge padha arep nyore.
Ndeleng kahanan sing kaya kuwe, dhong
pas kumpulan RT neng RT 01 RW 04 Kelurahan Pabuwaran pak Slamet Risyanto, ketua
RW nduwe gagasan sing maen lamona gili gedhe Pabuwaran aja dejenengi jl. HR.
Bunyamin. tapi deganti baen dadi jl. Badhogan baen dadi lewih pas. Krungu kaya
kuwe mas Sonny sekretaris RT. nyritakna lamona mligi warga RT 01 angger padha
madhang neng warung utawa rumah makan neng jl. Badhogan kuwe olih potongan,
segane ora deetung.
Inyong moh kalah karo mas Sonny
banjuran nyambung kaya kiye: “Soale ora tlaten kon ngetung segane ya mas ..
sedhek kencoten .. tapi aja kewatir .. angger pas arep mbyayar neng
ngarep kasir .. sebut baen jeneng inyong .. mesthi gratise”. Krungu omongane
inyong kaya kuwe .. wong-wong padha reang karo ngomong: “Lha enggih gratis .
wong mung nyebut jenenge Eyang Nardi ….”.(Ir Sunardi,MT, pemerhati budaya
banyumasan/05)
Wis demuat nang Harmas 3 September 2015
0 comments :
Post a Comment
Kesuwun rawuh lan komentaripun, Sedulur...