CARA jaman inyong
bocah, biyunge guli ngudang : Anaku mbesuk gedhene dadiya wong sing kopama.
Ora kurang sandhang-pangane-seger-waras. Cara kuna mung depujakena ora
kurang sandhang pangan. Sebabe wong tuwa gemiyen, wong tuwane inyong soten. Ora
nggandra-nggandraa, mujekena sing ana neng alam siki. Ora kurang
sandhang-pangan kuwe wong peng-pengan.Jaman semana ! Sekiye ya,
sandhang-pangan, papan, mobil, thethek bengek.
Mmanut jamane. Jaman sekiye
bisa baen wong tuwa ngudang anake : Mbesuk gedhe bisaa dadi Mentri.
Kiye kudhangan sing maksude
kepenginan,, ngandhung donga. Wong tuwa ngudang anak-putu-turun debarengi
donga. Beda maning karo kudangan , kuwe ya kepenginan ningen ngudokena.
Malah kepara kaya srana utawa sarat, uga kaya patembaya.
Kiye angger pentas wayang,
sing lakone rabi-rabian. Kaya lakon Parta- Krama. Sembadra guli njaluk kudangan
werna-werna. Mbangkane sapa bae sing teyeng nggolet kudangane kuwe , sing bakal
krama karo Sumbadra. Nggolet maksude, guli nggolet olih apa sing de kudangena.
Nggolet ora olih ya padha bae nggadur. Mbangkane kudhangane aboteora mupakat.
Ana gamelan lokananta , Kebondanu pancal-panggung akehe 40. Patang puluh ekor
apa ya ! Ya pokoke kebo ndanu akehe 40. Banjur kembar mayang kayu klepu.
Dewandaru putri dhomas, Jenenge putrid dhomas kuwe akehe 800. Dho=2, mas=400, 2
x 400 = 800. Deneng dadi matematika. Kepriwe si kakine !
Ora kaya kuwe. Akehe sok
padha kliru. Putri dhomas 40. Kiye ora bener. Sing bener 800.
Kakine ! Putri dhomas nggo
nggiring penganten, ya kemridig banget. Ndilir kaya karnafal.
Jenenge crita. Angger wong,
kudangane mambrah-mambrah kaya kuwe. Kejaba ora memper, ya langka sing teles
nggoleti. Kuwe bedane wong karo wong neng crita.
Kakine mbingungi. Ana wong,
banjur wong nwng crita. Keprimen jane !
Ngonoh de pikir dhewek, wis
gedhe tuwa ikih.Bali maring lakon Parta-krama. Sing jenenge Parta kuwe, ya
Permadi. Mbok ndarani Parta sing neng opera OV Java.
Kae tuli Parto, udu Parta.
Kepriwe kakine.
Apa iya ! Banjur Sumbadra,
nom-nomane jenenge Brata Jaya, uga Lara Ireng. Angger neng wayang , jenenge
putrid Kopama, arep darah ngewong, ora janji ewong. Kiye kudangan sing maksude
njaluk. Ya kepenginan maksude. Gandheng ngudokena, kudu ana. Ya padha karo
njaluk, ya kuwe njaluk kudangan.
Dadi angger ngudang anak,
kuwe kepenginan wong tuwa penuh kasih-sayang. Harapan penuh doa. Kaya tembange
bocah taman Kanak- Kanak, tembang Kasih Ibu. Maksude ibune hanya memberi , tak
harap kembali.
Deneng beda temen karo
kakine!Kepriwe sih !Angger kakine, urung memberi, wis harap kembali.Kuwe tuli
anu jujul. Ko ora de jaluk jujule ya nglehem.Kakine basa-anu. Nglehem tuli
kedhengan.Apa iya! Kiye beda maning. Ngudang sing maksude perang utawa nantang.
Perange satriya. Padha dene digdaya, padha dene kondhang. Kiye ya neng crita
wayang maning. Perange Janaka karo adhipati Karna, kuwe perang tandhing. Banjur
padha dene ngetokena pusaka. Guli nantang nganggo tembung : ngudang siyunge
bethara kala. Maksude adu pusaka, perang gaman, ningen gamane keris, utawa
dhuwung. Angger perange ngganggo nglepasena panah. Udu ngudang siyunge bethara
kala.
Kakine inyong kemutan de
kudang biyunge. Dhong inyong egin cilik. Inyong mbeke teyeng dhindhek-dhindhek.
Esuk-esuk thongkrong neng ngarep bawon nunggoni biyunge daden geni. Karo
monggeni, kukuse geni de usap neneng biyunge, banjura de usap-usapena neng dhengkule
inyong. Kari ngusap dhengkul inyong biyunge mujekena.
Ujarku kaya kiye biyunge
guli mujekena, kon sangkane inyong mlayu banter.
Gang-gang kewagang
Mbesuk gedhe mlayune
jemligrang
Dawa lempate, kaya kidang
Mlempat sepisan
sedawan-dawan
Jane esih ana maning kaki !
Kelalen koh!Dadi gemiyen biyungmu guli ngudang ko, kon sangkane mlayu banter.
Mulane si dhong nyolong pakel tek oyok-oyok ora kecandhak, ko!
Lah, kakine Pakel tiba neng
nduwur tlepong baetek jiyot ora olih. Jiyot bae tek gawa malyu, delepen ngoyok!
Kawus benene nglekar neng kalen. Kepleset-ora miraha de balangi kulit gedhang.
Dadi ko ngonon ,sing
mbuwang kulit gedhang ! Asu buntung, wong tuwa desengi balapan.Kakine bae, ora
memper. Pakel tiba neng dhuwur tlepong, de jiyot ndadak de oyok-oyok.Lah wong
sekang kadohan ketone mateng!Terusna maning, Ki1 Aja ketungkul crita
pakel.(Darkam AS/05)
Wis demuat nang Harmas 3 September 2015
0 comments :
Post a Comment
Kesuwun rawuh lan komentaripun, Sedulur...