Aja Kelalen Basane Dhewek

ORA kaya biasane, bubar sholat Subuh Blokeng durung metu sekang senthong. Mangkane biasane angger arep mangkat sekolah, mbukaki kekeb nggolet panganan sing kena deplok. Ningen esuk kuwe, awit uput-uput, wis sinau ndrememel.
Gole ngapalaken seru pisan kaya wong lagi pidato: “Pegawe padha rapat jenenge meeting. Esuk-esuk padha kandhahan arane coffee morning. Pejabat nampa rakyate, sebutane open house...”
Banget ruwinge, biyunge banjutan ndhodhog lawang senthong, ngemutaken lamona wis awan durung sarapan acan-acan. “Mengko gole mangkat kebuntrak-buntrak ketungkul pidhatoan bae,” jere biyunge.
Blokeng mbukak lawang karo mesem: “Good morning, Yung. Good morning, Bapane!”
“Bocah lagi kesambat apa jane.” Biyunge ngaruh-aruhi.
“Pancen biyunge ora ngerti globalisasi. Siki jamane bocah sekolah kudu pinter ngomong Inggris,” semaure Blokeng kambi jungkatan.
“Globalisasi kena bae, ningen aja kelalen Sumpah Pemuda 28 Oktober. Satu basa basane dhewek basa Indonesia,” welinge bapane.
“Iya pancen. Bocah sekolah siki, kawit TK, SD, SMP, apa maning SMA, angger ketemu gurune ya padha mornang-morning basa inggrisan,” jere biyunge kambi nata sarapan. “Ora susah kuwatir, Bapane-Biyunge. Pokoke, satu nusa, satu bangsa, dan satu bahasa Indonesia,” omonge Blokeng maning.
Bapane kelingan nalika Bung Karno ngglorakaken semangat nasionalisme nang tahun sewidakan, tanggapan masrakat gedhe pisan. Jeneng sing mambu basa asing padha degenteni. Acara dansa-dansi sing dudu kebudhayane dhewek deganti tari pergaulan Srampang Dua Belas.
“Toko-toko neng Praketa sing kurang rasa Indonesia-ne uga pada ganti aran. Neng pojok alun-alun ganu ana foto Johnson, banjutan deganti dadi foto Pemuda. Toko Paris duweke wong India sing dodolan cita, ganti jeneng dadi toko Laris.” Bapane crita.
“Iya ganu ana bioskup telusing ana neng Purwokerto yakuwe Gloria dadi Srimaya, Elita dadi Nusantara, banjutan Capitol ganti jeneng dadi bioskup Garuda,” ujare biyunge.
Kambi mbatari sarapan, bapane aweh piwulang maring anake lanang. Jere siki wong wis padha kelalen maring basane dhewek, basa banyumasan. Bocah sekolah isin ngomong Banyumas mbok dearani bocah ndesa.
Semana uga wong tuwa, akeh sing ninggalaken basa Banyumas merga jere ora miyayeni. Basane wong ndhep-ndhepan utawa basane kuli kaya bapane Blokeng sekanca batir. Mulane angger ora nana sing gelem nguri-uri ya bisa ilang, wong siki bae wis padha kelalen.
Rong dina maning warga Banyumas agep mengeti Hari Sumpah Pemuda. Neng dina sing apik kiye, kena nggo pengeling-eling magreh padha bareng-bareng ngomong banyumasan.
Aja ngasi pemuda Banyumas isin ngomong apa sinau basa banyumasan. Mbokan padha kelalen maring basane dhewek. Krungu piwelinge bapane, Blokeng janji ora arep gagah-gagahan ngomong inggris-inggrisan maning. (06)


Wis demuat nang Harmas 10 Oktober 2015

Read More

Aja Ngasi Kelalen Basa Banyumasan

BALI sekolah Blokeng kambi kancane padha pating gedhubrug kumpul neng mburi umah. Jere arep padha latihan bahasa Inggris, wong sekolahane agep ketekan siswa sekang Landa Ostrali. Perlune arep padha ginau budhaya banyumasan sing jebul kondhang tekan mendi ora.

Gole ngapalaken seru pisan kaya wong lagi pidato: MynameBlokeng, tegese jeneng inyong Blokeng. I amthe son of alaborer, inyong anake wong pahalan. ButIwant to be asmartkid, ningen inyong kepengin dadi bocah pinter. My hobbies arewatchingpuppets, senengku nonton wayang...

Gole ngomong kaya iya-iyaha nganti batire padha ngguyuyu kemekelan.

‘’Ya wis bisa makili kanca-kanca sekelas,’’ ujare Otong.

‘’Dhonge hobine ya aja nonton wayang, ndesani temen,’’ omonge Sarno.

‘’Malah angger hobine maring kafe, bocah kana ya ora gumun,’’ Blokeng ngeyel.

Biyunge banjutan njujugi umben rucuh asem karo panganan . Urung ngomong apa-apa wis desambut neng Blokeng.Good afternoonYung. Meandmy friendslearn Englishagain.
Youknow?

‘’Ala gujih, wis liren dhisit padha medangan,’’ ujare biyunge ora ngerti apa sing diomongaken Blokeng.

''Pancen biyunge ora ngerti globalisasi. Siki jamane bocah sekolah kudu pinter ngomong Inggris,'' semaure Blokeng kambi ngumberucuh asem.

''Globalisasi kena bae, ningen aja kelalen basane dhewek basa Indonesia,'' welinge guru Sikun sing melu ngrungokaken sinaune Blokeng sekanca.

. ''Ora susah padha kuwatir . Pokoke, satu nusa, satu bangsa dan satu bahasa Indonesia,'' omonge Blokeng maning.

Bapane dadi kelingan nalika Bung Karno ngglorakaken  semangat nasionalisme nang tahun sewidakan, tanggapan masrakat gedhe pisan. Jeneng sing mambu basa asing padha degenteni.Jeneng bintang pilem Lince Tambayong ganti aran dadi Rima Melati.

Dansa-dansi sing dudu kebudhayane dhewek deganti tari pergaulan Srampang Dua belas. Toko-toko neng Praketa sing kurang rasa Indonesia-ne uga pada ganti aran. Neng pojok alun-alun ganu ana foto Johnson, banjutan deganti dadi foto Pemuda.

Toko Paris duweke Laju sing dodolan cita, ganti jeneng dadi  toko Laris. Telung bioskup sing ana neng Purwokerto yakuwe Gloria dadi Srimaya, Elita dadi Nusantara, banjutan Capitol ganti jeneng dadi bioskup Garuda.

Siki wujud semangat Sumpah Pemuda beda maning. Nang Baturraden ana 20 siswa SMK sing padha mlahu meng Istana Negara. Baturraden-Jakarta sing adohe 450 km arep delakoni 20 dina wis gutul, banjutan melu upacara dina Sumpah Pemuda neng Istana.

Senajan wis 85 taun, tekan siki Sumpah Pemuda esih dadi salah sijine pengilon lakune para pemuda.Mulane bapane weling maring si Blokeng, semangat kuwe, kudune ana nang sejrone jiwa sekabehe pemuda Indonesia nggo njaga kesinambungane bangsa.

‘’ Ningen ndeleng kahanan siki, ketone semangat Sumpah Pemuda siki wis krasa mulai luntur,’’ jere bapane.

Bocah nom-noman neng Banyumas, siki akeh sing padha kelalen karo basane dhewek. Ketungkul seneng ngomong basa Inggris, nimbang basane banyumasan.Apa maning akeh pemuda Banyumas sing isin ngomong apa sinau basa banyumasan. Krungu piwelinge bapane, Blokeng janji bahasa Inggris ora arep gagah-gagahan ningen nggo pengetahuan sing kudu dingerteni. (05)

Wis demuat nang Harmas 10 September 2015

Read More

Arep Mangan Beras Mancanegara

MANGSAN terang dawa  tumrap Bapane Blokeng gawe bunek pikiran. Ora mung warunge biyunge sing jere kenang kebul, dadi keton belok pisan. Klambi sing kotor  pating klumbruk ora bisa diwasuh jalaran langka Banyu. Esih detambah biyunge bocah sing njaprut awit esuk, mergarega barangpadha mundhak merekaken warunge dadi sepi.
Buruh pocokan kaya Bapane, aben dina isine mung bingung arep glesek pangan maring endi. Tujune baen wingi olih kodhean ngrikati gudhange panciunan pegawe kabupaten. Baline mbrongkot pisan, degawani tumpukan koran lawas, lumayanan esih kena nggo buntel karo wacanan.
''Kayong ndara klerek esuk-esuk molak-malik koran. Klowoh be suwung gemplung, jajal madan melu mikir dina kiye arep mosak-masik apa,'' Biyunge Blokeng nggamprong sing lanang.
‘’Gari nyidhuk beras IR apa beras Grendheng anu nyandhing bekoh bingung,’’ ujare Bi Rijem sing agi becer.
‘’Kothak dagangan tah kebek, ningen beras nggo depangan arian sing suwung,’’ ujare biyunge.
''Kae neng tlesepan kupluk toli esih ana dhuwit rolas ewu. Aku degawekna tegean gandhul kambi kedhele ireng, nggo pedhes-pedhes degerusna sambel tlenjeng wis cukup,'' semaure sing lanang karo esih maca koran.
''Kanggone rika cukup, Blokeng dempani tegean ya disembur-semburaken ora gelem madhang,'' jere biyunge karo nglius mburi.
Sing lanang mung mesem, wis apal karo polahe bojone sing glogok sowar. Mengko nek ngudarasane wis rampung toli meneng dhewek. Ngomong apa bae aja desranggah mbok malah dadi tambah reang. Udan-udan padu ora patut derungokna tangga.
‘’Ya nggo Blokeng dejukutna peda dagangan apa didadaraken endhog. Mengko bali ngodhe masa ora tek bayara,’’ jere bapane.
Biyunge ora senggu ora wain, banjutan maring warung nemoni Bi Rijem sing arep becer. Senajan mung sekolah rakyat, Bapane Blokeng seneng maca koran. Mbuh koran bekasan apa koran templek neng alun-alun. Nek olih kodhean neng kana, merlokaken maca. Mulane ngerti bab pembangunan proyek nang endi ora akeh sing padha telat.
Wong cilik kaya penginyongan, padha krungu jere pemrentah agep tuku beras maring mancanegara, merga wedi mbok simpenan  berase ora gutug tutup taun, mangkane panene urung wrata.
‘’Lha jere Cilacap berase mambrah mumbruh ngasi dedoli maring Jawa Barat,’’ ujare Tano maning.
‘’Ya wong nyatane pemrentah agep tuku beras maring Pietnam apa Thailand,’’ ujare bapane.
‘’Iya Pak Yusuf Kala wis ngomandho ben gageyan tuku beras luar negeri,’’ ujare  Guru Sikun.
‘’Lha iya, wong beras bae wis ora duwe. Kaya jaman ganu maning dodolan montor mabur bayarane nganggo beras. Lha siki agep dodol apa wong ora duwe motor mabur gaweyan B andung maning,’’ ujare bapane maning.
Penginyongan wong blekethiran mung bisa ngelus dhadha. Jere negarane makmur jibar jibur, deneng beras bae wis rekasa. Apa enggane kon mangan leye maning kaya jaman kuna?. (05)

Besutane Kang Didi Wahyu

Read More